D5-再見北韓！金日成廣場

7:00　　酒店早餐
8:00　　金日成廣場
8:15　　手信店
9:40　　火車


補打2012.8.30 Part 1

話咁快到左最後一日既北韓之旅，每日都係走馬看花咁又過左一日，因天雨關係，好多地方未去

北韓，一個我會再黎多次既地方！最後一日本身係無行程，可能導遊都要寫report好難交代？



所以o係去火車站既路上，車左我地去金日成廣場遠望左一眼，同埋影埋大合照就走人～我地問女導遊

我地返左香港仲可唔可以同你聯繫？女導遊話緊係可以啦，你可以打比我又可以寫信！只不過

打比佢個時會有黨人聽晒你地全程對話，寄信比佢仲要比人打開晒檢查內容之後再決定比唔比得當事人

　＊原來我影到張雙層巴

即係講到尾，你可以聯絡我，不過我到最後收唔收到你電話／來信又係另一件事嚕！講真，你收到先奇～哈

去到手信店買左ｄ手工藝品，本身好想買開城個銅碗！點知一隻碗開價200人仔，神仙爐更開價600人仔！

  

最後我地9:00到就去到平壤火車站，呢到真係日日都咁多人！入到又買左小小野之後就要上火車～

係月台上面，我又不停偷影，更被軍人大喝叫我唔好影，佢叫出黎個聲真係嚇Ｑ死我！洗唔洗咆哮先



其中一個男團友，問男導遊可唔可以比佢手提號碼佢，如當佢第時再黎朝鮮就聯絡佢，男導Man爆話OK！

上面個部就係北韓國產手機，如果要買一部電話，等如北韓人民平均一年人工，所以北韓唔係好多人有電話

佢地用都係用公共電話亭，我懷疑導遊電話都係中央發比佢地，因為等佢地發生咩都可以聯絡上頭！

始終！係北韓生活入面，服從上級，報告上級係最重要既事！上到火車，男女導遊一一咁去每個車卡同我地講８８



講左咁多日韓文既我竟然都無比人當場捉住唔比返黎：）到火車就開個時，女導用韓文同我講언니 識到你好開心

我都同佢講：我都係～ 我會掛至你以啦～女導扮嗚嗚嗚咁沖過黎同我擁抱！個一刻終於覺得原來北韓人都會表達佢內心

之後男導遊都有同我講：香港아가씨再見～我都回佢一句：오빠再見！佢聽到之後哈哈哈咁大笑！原來오빠呢個字，南北韓都咁好用！



火車開左兩個鐘到，我地每個車卡分開咁去火車食堂到食飯，當d送黎到，我打算拎相機影都唔比，佢話一上火車就唔比影相

所以呢餐影唔到食咩，記憶中有涼拌青瓜，炒蛋，煎黃太魚，辣茄子，炒土豆絲，菜干湯，白飯！

返到車卡個時，同卡既中國人問唔知幾時查相機！我話：下，要查相嫁？　佢地話：係呀，睇下邊ｄ相出得境邊ｄ唔出得呀嘛

好在我帶左三張SD卡去，旦我換左張"吉"卡入相機都夠假啦！佢地點會信我地帶相機去無影到相？我唯有拿拿聲收埋張卡入M巾到



換左張"吉"卡影團友相機d screen 囉！四個半鐘既車程，由平壤到新義州，我地又係時候要落火車再轉巴士/火車入中國

轉車個時，比我遇到最後一個火車站手信店，即刻再入漫畫同CD！因為時間太緊迫，無咩揀到就係咁買左先算

上巴士過中朝友誼橋之前，終於到左檢查行李時間！我地4,5團人逼住係一間房仔到，要將Ｄ行李象徵式過X Ray！

點解係象徵式呢？一）X Ray無連接電腦，無人睇你個行李入面ｄ野　　二) 部機舊到好似古董咁，識郁算係奇蹟

我地淨係過機呢part都用左一個鐘.....成功照行李後就要出去間房仔外面搵番自己領隊上巴士！


之不過上既宜之後，仲要通過最後北韓軍方檢查！我地遇到個個唔知係唔係趕收工，一個人相機都無查到！

只係對下你個樣同文件上同唔同，同報左人數之後就走得，領隊話我地好好彩，因為之前佢地用火車過中朝友誼橋

北韓軍人係火車上一個個咁查相機，有人直頭比人ｄｅｌ晒所有相，基本上可以出境既相唔多........


拿，呢ｄ真係信不信由你，我上網搵資料個時，其實無見過話查相機，仲要咁嚴？！

可能領隊到走個刻仲想保留北韓神秘緊張既氣氛先咁同我地講下嫁者？上左巴士後，唔洗十分鐘就由北韓到中國

（原因係北韓同中國真係只有一江之隔，中國邊境丹東同北韓新義州就係靠中朝友誼橋連住，所以車程只要十分鐘）

到左中國後，用回鄉証再入境，呢次北韓之旅係中午時份就完結lu～

返到中國丹東，抬頭一望，個天空都藍ｄ？明明一橋之隔，除左一小時時差之外，就連天色都差咁遠？