坐火車入北韓【偷影★沿途好風光】

8:00　　  集合過關
10:00　　第一程火車（丹東>新義州）
12:00　　轉火車（新義州>平壤）
5:00　　  平壤到達

補打2012.8.27 Part 1


今日一早起身，酒店送既早餐都無食就出發去集合，原因係酒店送既早餐非常唔岩食.....我同朋友都揀唔落手...

  

集合時，領隊再問我地一次，係唔係已經放低晒所有電子產品比佢地保管？

行到去火車，見到有勁勁勁多人～所有去北韓既旅行團都集中晒係火車站...聽完領隊講北韓入面既注意事項後



領隊點名，一個跟一個咁排好，仲叫我地記住個隊形，好好笑，好似返左去小學時代咁～

不過！一人一個號碼，對大陸團真係好好用，因為最少唔洗爭！如果無號碼，ｄ人一定一野就係咁逼

排好隊，我地就係火車站到用回鄉証過關，因為佢地得10:00 同4:00 先有車去新義州

  
 

所以基本上今日去北韓既旅行團都係呢個時間出發！今日因為天氣太太太熱，我貼左個小林退熱貼過境

關員問我個頭做咩事，我就話呢個係退熱貼，中國關員話：原來有ｄ咁好既野，又幾好喎...

  

過完關等左陣，第一程去新義州既火車就黎左啦，上火車前，北韓官方人員會一個一個咁check 你d Passport

話說呢part其實仲係中國領土到進行！但佢地都已經阻止我係火車站到影相......旦我都無理，一見佢地唔覺眼就影

  

由丹東去新義州只不過係10分鐘車程，經過尋日條中朝友誼橋，橋既另一邊就係北韓！好神奇～

到左新義州時，我地要拎定Passport出黎等北韓官員黎查樣同查行李（上圖最左手既女軍人就係查行李）



查行李個時，如果佢見你帶報紙，書既話，佢地會一頁一頁咁睇有無北韓新聞，如果有的話全部唔比帶

我隔離個台，淨係check佢d報紙內容都check左5分鐘以上，大相機佢地主要查你部野有無GPS
  

  

 

到輪到查我個時，因為我拎左d文具打算比北韓小朋友，之前個晚已經Pack好晒一包包用個白色袋裝住

個女軍人係咁扯我個篋d文具黎睇係咩野黎....檢查完晒之後，我地鎖番好ｄ行李就轉另一架火車入平壤



我地呢架火車係同其他北韓市民一齊搭，不過佢地一早劃分好晒外國人車卡，所以我地無機會接觸到北韓市民

一個車卡坐六個人，不過我地個卡得四個人，真係好好彩～唔洗咁逼，上車無幾耐就派飯，一人一盒另有一支水

但呢到跟本就係一間桑拿房咁....因為外面太陽好勁，旦佢地又未等齊客人上車，遲遲都未開，我以為我一定死硬

直頭有乾煎既感覺，等左半個鐘到，終於開車，呢個時候竟然有人入黎開冷氣！！！冷氣冷氣冷氣冷氣...

不過佢個冷氣係兩間房share一部，其實都唔係好涼...所以我地直頭打開窗好好咁去感受下北韓風景



沿途進入北韓既風景都好靚，全部都係農村風格，小朋友每日上學就係要行過晒呢一片田去返學

成年人有ｄ會踏單車出市區，而老年人就會落田工作，無汽車，無電線干，少左一份污染



講起無電線干呢件事真係好經典～係北韓好多時會見到好多＂無線電線干＂

旦並唔係佢地太先進，ｄ電線入晒地，原來係佢地好多人因為窮得滯，爬上去電線干刮ｄ銅線去賣



而農田附近都係草屋為主，其實我都唔清楚ｄ草屋係佢地生活地方？定休息地方？

如果生活地方，咁落雨落雪又點算呢？不過諗諗下古時ｄ人都係扎草屋住既者...總有解決方法



由新義州去平壤要5個小時車，一共有十個中途上落客既站，而由於佢地有好多路係單線行車～

有ｄ時間要停係到等對面火車行左，先到我地行，加上北韓火車仲停留係＂蒸汽火車＂年代



即係一路行，會有ｄ＂卡呱，卡呱，卡呱＂，行到咁上下，要噴氣＂嗶.......＂個ｄ

所以你見我ｄ相，雖然係行車中，旦都可以影得咁清，無鬼影，你就知架車有幾慢？

 

 

上火車前已經講明唔可以影相，旦係我緊係忍唔住，開頭影都好驚死，係咁擋住唔敢光明正大咁影

後尾影影下，個人勇左，影到札晒馬咁，點知比巡房軍人發現左，比佢好大咁"喝"左一聲

 

真係嚇死我！本身我以為佢會黎要求我刪相，點知又無喎，淨係"喝"完我就走左～

訓下，影下相，再食下由中國帶入黎既零食，四個多小時後終於遠距離見到柳京酒店既外觀

幾年前，仲未貼完既玻璃外場，而家已經貼好晒，變左小左個要問既問題。。。四個多小時車程結束！

北韓之旅正式開始！！！