D1-偷窺北韓之序幕【中朝邊境丹東】上

9:30　　  中國旅行社交資料
10:00　　中朝邊境遊
13:00　　食韓國菜
17:00　　鴨綠江斷橋


補打2012.8.26 Part 1　（如有時間我再補打大連）

其實呢篇北韓之旅既序幕應該係由大連開始，但因為大連無咩野好打，我就由【中朝邊境丹東】開始寫起

由大連去丹東，我地無坐到長途巴士，反而選擇左係火車站附近就咁係街邊拉客既"白牌車"

"白牌車"一般比長途巴士貴20人仔到，但就勝在point to point，同埋時間有彈性，你鐘意叫佢幾點黎就幾點黎



不過壞處就係，你要同3-4個唔識既人一齊逼4個鐘車去丹東，後尾返到香港同亞媽講起～

佢話大陸"白牌車"好危險，車到你去高速公路割你ｄ胃呀，腸呀，腎呀就係呢ｄ"白牌車"



佢話我無穿無爛返到黎真係偷笑，其實決定上"白牌車"個時無諗過太多人生安全

因為個時係紐西蘭都係咁hitch ride！都無乜問題，不過大陸ｄ"白牌車"唔知係唔係因為入夜關係



個個一上高速就化身舒密加～130/km定150/km我都唔知啦，淨係知道我係條路上飄移緊！唔敢訓

因為我地揀左坐夜晚車，高速公路上，無街登，路上又無咩野反光牌，個刻終於明白長途巴士點解無夜車入丹東

　＊左北韓右丹東
夜晚９：００到左丹東火車站附近既酒店，Check in 完就出左去食串燒～好味到不得了～

我地住係丹東既3晚都係去左食串燒～呢個再遲ｄ介紹～呢家先講下我地準備入北韓之前一日既事～



呢日，我地一早就去左旅行社交低passport同兩張證件相比佢地做簽証用～同埋終於可以放低團費

由於佢呢到只收現金，開頭個兩日，日日拎住一疊人仔，真係咪話唔驚～



其實由酒店一落黎個時，係火車站前面會見到好多呢ｄ三輪車～即係類似泰國既＂苯苯仔＂

佢不停撩我地話: 來回六十蚊玩三個鐘，車你去搭遊覽船，可以睇到北韓小別墅，北韓軍人，北韓工廠...十幾個景點
 

我地最後講價到來回 50 人仔（2人），開車後明白點解來回３個鐘咁抵！因為呢架＂苯苯仔＂係龜速

我地直頭唔可以行馬路線，要一直靠邊邊行，唔怪得知咁抵玩～好在呢日天氣好既關係，沿途風景都好靚！



沿途經過一步跨同虎山長城，不過司機叫我地玩完遊覽船，回程時先比我地去影相



船飛有分70人仔，100人仔！70就係下圖呢隻，要經歷上圖打賓頭爭上船既情景，再上船爭位



而100人仔就係一船6個人，坐大飛入去，因為我唔敢坐大飛～我決定比70搭左上面隻船



出發約十五分鐘後，船長就叫我地人人收起相機，原因係我地要入北韓海域！唔可以影入邊任何野

更加唔可以影軍人，不過咁難得，我都係忍唔住偷影左上面呢幾張～北韓小朋友係爛美軍船上玩水

北韓超廋牛牛（牛係北韓比男人，女人仲值錢～因為可以用黎做苦力）！



仲有傳說中既別墅！..............根本就係一個片場，就好似迪士尼你坐船經過食人族同噴火瀑布咁

圍住河邊見到既北韓人（演員?）會笑住玩水，新到不能再新既小別墅，有牛，有羊，有雞係到食草，有人釣魚

  

可能我地外人覺得呢ｄ係演員，亦有可能係真人真事？？可能佢地真係生活得好幸福，而我地硬係覺得佢好慘都唔定？

 

落船後，我地即沖上去買北韓紀念鈔！好後悔買得一套，因為最後發現成個丹東，最平呢到！！仲有買左ｄ北韓煙仔！3蚊包



紀念鈔價錢！15 人仔一套！好平！（其實我地住間酒店樓下都有賣紀念鈔，我地第一眼見到個時叫晒，又係15 人仔）

我地仲叫酒店小賣店個人一定要留六套比我~個人可能以為我地係大客仔，出入都打晒招呼笑晒咁！！

點知去完北韓返去酒店個時.................下一篇先講個結局你知～

 

由於我地搭大船唔係坐大飛既關係，用多左好多時間，上左岸個時我地又要去買紀念鈔同北韓煙仔

司機大佬完全黑晒面，去程時明明同我地有講有笑，仲做埋導遊介紹中國同北韓既關係～



回程時我地要求佢停低比我地影相，佢就話我地用左佢好多時間，所以我地最後落車時比原價佢



「一步跨」顧名思義，只要你踏出一步就可以輕易進入北韓，旦亦都有可能你真係踏出左呢步之後

會比人亂槍射死，亦有可能比人拉你去勞改，所以我諗無咩人夠膽跨出呢步，反而好多北韓人想跨過黎先唔頂



其他大家有無諗過，中朝之間只有一江之隔，其實北韓人逃走一ｄ都唔難，只要收埋邊境軍員

跨出呢步係幾咁易既事呢！但點解由中國望到既北韓人唔會逃到中國？



原因一：因為佢地連收買邊境軍員既錢都無？　
原因二：佢地無見過外面世界，可能真係覺得自己國家係最幸福？
原因三：佢地無勇氣？
原因四：我地見到既可能都係（演員）？其實佢地係邊境到返緊工做Show比我地睇，玩緊角色扮演？

參考資料：
2011年以前只要脫北者過了江，朝方士兵就不再開槍。不過自從金正恩當了接班人後，就改變策略、強化了專政管制，無論脫北者過不過江一律開槍射殺。在中朝邊界上看到脫北者的屍體很常見，這些屍體都是順水漂流到中國一方，如2003年10月3日與4日，在吉林某地的鴨綠江中警察打撈出朝鮮人屍體男性36具、女性20具，其中有5名男孩和2名女孩共7名兒童[7]。只要是脫北者，無論是否成功離開朝鮮，其親屬無論長幼也將被牽連入獄（如送往會寧集中營）。［credit: wiki］

我亦都曾經聽過，被人由中國捉到既＂脫北者＂要用鐵線從兩隻手手心穿過，再博住黎拉佢返北韓